انصار: (د سلواغی ۱۱مه) په داسې حال کې چې ملګري ملتونه د راتلونکې فبرورۍ میاشتې په اتلسمه او نولسمه نېټه د افغانستان په اړه په قطر کې د یوې ځانګړې غونډې تیاری نیسي، نښې نښانې ښيي چې د طالبانو رژیم له دغې ناستې سره پرېکون وکړي.
د طالبانو د رژیم ویاند ذبیح الله مجاهد تایید کړې، چې دغې ناستې ته د دوی د بهرنیو چارو وزیر امیرخان متقي بلل شوی، خو هغه باور لري چې دا ناسته د ده په باور« د زړو مهرو» د بیا ژوندي کولو هڅه ده.
مجاهد نه ده روښانه کړې، چې له « زړو مهرو» څخه یې موخه څوک دي، خو هغه معمولاً دا اصطلاح د دوی مخالفو سیاستوالو ته کاروي.
د ملګرو ملتونو سرچینو هم نه دي ویلي، چې په دوحې ناسته کې یې د ګډون لپاره د سیمه ییزو هېوادونو له استازو پرته د افغانستان له اړخه کوم لوري بللي. ملګرو ملتونو تایید کړې، چې د طالبانو رژیم دغې غونډې ته بلل شوی.
د دوحې غونډې یو اصلي هدف د افغانستان لپاره د ملګرو ملتونو د یوه ځانګړي استازي پر ګومارل کېدو خبرې اترې دي.
دا استازی، چې د ټاکل کېدو وړاندیز یې د افغانستان لپاره د ملګرو ملتونو ځانګړي همغږي کوونکي فریدون سینرلي اوغلو څه موده مخکې، د ملګرو ملتونو امنیت شورا ته د افغانستان په اړه په خپله ارزونه کې کړی و، دا او نورې غوښتنې یې د امنیت شورا له لوري تایید شوي او د عملي کیدو لپاره یې د فبرورۍ میاشتې تر پایه د نوموړي ماموریت هم غځول شوی دی.
د طالبانو رژیم د اوغلو د ارزونې له ډېرو ټکیو سره موافق دی، خو د افغانستان لپاره د نوي ځانګړي استازي د ټاکل کېدو سخت مخالف دی.
په دې اړه د طالبانو د بهرنیو چارو وزیر امیرخان متقي په وروستي ځل په کابل کې د سیمې د هېوادونو له استازو سره جوړې شوې غونډې ته وویل، چې د یوناما په موجودیت کې د دغه استازي د ټاکلو اړتیا نه لیدل کیږي.
تازه، د طالبانو د رژیم ویاند ذبیح الله مجاهد خبرداری ورکړی چې دوی به د دغه استازي د ټاکل کیدو په صورت کې له نوموړي سره همکاري ونه لري.
طالب ویاند همدا شان په دوحې غونډه کې د دوی د رژیم ګډون او نه ګډون هم نه دی تایید کړی او ویلي، چې په دې اړه به وروسته پرېکړه کیږي.
له دې سره هم مهاله، د طالبانو یو شمېر مخالفو ډلو او له هغې ډلې په ترکیه کې د شمال ټلوالې له جنګسالارانو جوړه شوې د « ملي مقاومت عالي شورا» ځینو مخکښانو له ملګرو ملتونو غوښتي چې یادې ناستې ته دې دوی هم وغواړي.
دوی ګیله کړې، چې د افغانستان لپاره د ملګرو ملتونو د نوي استازي په ټاکل کېدو ورسره مشوره نه ده شوې.
LINK: https://www.ansarpress.com/english/29908
Ghani Removed From UN Heads of State List 
